„ლუდი „34-ის" პიარ კამპანიამ შეძლო მოლოდინის დაკმაყოფილება და ლეგენდის შექმნაც კი“ - ნინა პერტენავა

კითხვა: რა არის 34?

შემდეგ 34 ლარად შეძენილი განსაკუთრებული არომატის ლუდი...

შემდეგ მყიდველების ძეგლები თბილისის ქუჩებში და

მოგვიანებით  კანის ლომების საერთაშორისო ფესტივლაზე საუკეთესო კამპანიისთვის მიღებული ბრინჯაოს ლომი.

ლუდი „34“-ის პიარ კამპანია ხმაურიანი აღმოჩნა საქართველოს ბაზარზე.

რა კომპონენტებისგან შედგებოდა კამპანია, რითი გამოირჩეოდა იგი ქართულ ბაზარზე და რამ განაპირობა კამპანიის წარმატება, სპეციალურად პიარ მეტრის რუბრიკისთვის, ლუდი „34-ის” პიარ კამპანიას აფასებს პიარ სპეციალისტი ნინა პერტენავა.

 

- ლუდი „34”-ის კამპანია ადამიანში ძლიერი დადებითი ემოციების გამოწვევაზე იყო მიმართული. კამპანია შეიძლება რამდენიმე ეტაპად დავყოთ:

1. მოლოდინის შექმნა -   აქტიურმა სარეკლამო კამპანიამ  ცნობისმოყვარეობა გააჩინა მოსახლეობაში. სოციალურ ქსელებში გვხვდებოდა კითხვა: რა არის 34?  ბილბორდზე, ტელე სივრცეში, მაისურებზე, ყველგან 34  გაჩნდა. რიცხვები  მიმზიდველი  სიმბოლოა, საიდუმლოს ამოხსნას სულ ცდილობს ტვინი.

2. თამაში გრძელდება და მეორე ეტაპზე გაოცების დრო დადგა. როგორც წესი, მოლოდინის შექმნის შემდეგ საიდუმლოს ფარდა ეხსნება და პროდუქტის აქტიური რეკლამირება იწყება.  ლუდი 34-ის კამპანიის შემთხვევაში პროდუქტი გაცხადდა, თუმცა მხოლოდ 3 ხვადასხვა ქსელის სუპერმარკეტში და ისიც მხოლოდ 5 დღით და 34 ლარად. ინტერესი გაოცებამ შეცვალა - ლუდისთვის წარმოუდგენლად მაღალი ფასი კი ახალ გამოცანად იქცა.

3. კამპანიის ბოლო ეტაპზე კი მომხმარებელი პიედესტალზე აიყვანეს და აქ თამაშის ყველაზე საინტერსო და სასიამოვნო ნაწილი დაიწყო: „34”-ის პირველ სამ მყიდველს ქალაქში ძეგლი დაუდგეს, ხოლო „34”-ის ყველა სხვა მყიდველს საჩუქრად უამრავი ლუდი გაუგზავნეს. ხუთი დღის შემდეგ, ლუდი „34”-ის ფასი 2 ლარი გახდა. ამ დროისთის უკვე ვებგვერდის და სარეკლამო რგოლების მნახველთა რაოდენობა რეკორდული იყო.

-  როგორ ფიქრობთ, რამ განაპირობა  ხალხის მაღალი  ინტერესი?

-  ეს, ის იშვიათი შემთხვევა იყო, როდესაც მომხმარებელი კამპანიის მთავარი მოქმედი პირია. პიედესტალზე აიყვანეს ლუდი 34”-ის მომხმარებელი, რომელიც გახდა გამორჩეული, ყველა სხვა ლუდის მომხმარებელთა შორის.  ეს  რთული და სწორი პიარ სვლა იყო, რომელმაც ხალხის ამხელა ჩართულობა გამოიწვია.

-   როგორია თქვენი კრიტიკული შეფასება, შეიძლებოდა თუ არა რომელიმე ეტაპის უკეთესად დაგეგმვა? 

- თეორიულად ყოველთვის არის შანსი კამპანია უკეთესად დაიგეგმოს, თუმცა მიმაჩნია, პერფექციონიზმამდე რამდენიმე ნაბიჯით ადრე სჯობს გაჩერება.  

შეიძლება ითქვას, რომ  კამპანიამ  მიაღწია დასახულ მიზანს?

 - პიარ კამპანიას აქვს ძალიან კონკრეტული მიზნები: ეს არის ცნობადობის შექმნა, რეპუტაციის ფორმირება და გაყიდვების სტიმულირება. მიმაჩნია, რომ კამპანიამ  საკმაოდ სწრაფად მიაღწია პირველ ორ მიზანს, რაც წესით დადებითად უნდა ასახულიყო მესამე კომპონენტზე. სამწუხაროდ, ინფორმაციას არ ვფლობ  გაყიდვების შესახებ.  

-  კამპანკანის ლომების საერთაშორისო ფესტივლაზე ბრინჯაოს ლომიმფლობელი გახდა, რა მნიშვნელობისაა ეს პრიზი ? 

-  კანის ლომების რეკლამის საერთაშორისო ფესტივალი 1954 წლიდან ტარდება და წელს იყო პირველი შემთხვევა, როდესაც საქართველომ ბრინჯაოს ლომი წამოიღო. რა თქმა უნდა, ეს ძალიან მნიშვნელოვანია აღიარებაა ჩვენთვის. კანის რეკლამის ფესტივალის პრიზიორები წლების განმავლობაში ხდებოდნენ მსოფლიოს ყველაზე ცნობილი ბრენდები, მათ შორის: მსოფლიოში ერთ-ერთ საუკეთესოდ აღიარებული ლუდის კამპანია «Whassup» Bud  Light(ლუდი) DDB Chicago-სგან, რომელმაც 2000 წელს ოქროს ლომი მიიღო.

მთლიანობაში როგორია თქვენი, როგორც პიარ სპეციალისტის  შეფასება?

 - მიუხედავად იმისა, რომ ქართული ბაზრისთვის იყო ნაცნობი მოლოდინის შექმნის პრინციპი, „34-ის” კამპანიამ შეძლო მოლოდინის დაკმაყოფილება და ლეგენდის შექმნაც კი. მომხმარებელზე ორიენტირებული კამპანია, სადაც ის მთავარი პერსონაჟია, უამრავ საჩუქარს იღებს  და ძეგლებსაც კი უდგამენ, ნამდვილად ათბობს ნებისმიერი ლუდის მოყვარულის ეგოს და დადებით ემოციას იწვევს მასში. კამპანიის პირველი და მეორე ეტაპი მაღალ შეფასებას იმსახურებს, ვიმედოვნებ პროდუქტი მომავალშიც სწორად იქნება პოზიციონირებული და კამპანია გაგრძელდება, რათა დაიმკვიდროს საკუთარი ადგილი ბრენდებს შორის.

ავტორი:ანი ციცქიშვილი

თეგები